15 სექტემბერი, 2026

Meta-მ Meta One წარადგინა – სააბონენტო სერვისი, რომელიც Facebook-ის, Instagram-ის, WhatsApp-ისა და Meta AI-ის დამატებით შესაძლებლობებს აერთიანებს. შეთავაზება მოიცავს ხელოვნური ინტელექტის გამოყენების გაზრდილ ლიმიტებს, აპების პერსონალიზაციას და კონტენტის ავტორებისა თუ ბიზნესებისთვის განკუთვნილ ინსტრუმენტებს.

აპების ძირითადი ფუნქციები და Meta AI-ის ყოველდღიური გამოყენება უფასო რჩება. გამოწერა დამატებით შესაძლებლობებზე წვდომას იძლევა. კომპანიის მონაცემებით, უკვე გაშვებულია 50-ზე მეტი ფუნქცია, ხოლო გამოწერებისა და საცდელი აქტივაციების საერთო რაოდენობამ 15 მილიონს მიაღწია.

სარჩევი

რას მოიცავს Meta One და რა ღირს გამოწერა?
Meta One კონტენტის ავტორებისა და ბიზნესებისთვის
ხელმისაწვდომობა და დაგეგმილი სიახლეები
სხვა თემები

რას მოიცავს Meta One და რა ღირს გამოწერა?

მომხმარებელს შეუძლია აირჩიოს ცალკეული აპის ფასიანი პაკეტი ან რამდენიმე სერვისის გაერთიანებული გამოწერა. ინდივიდუალური გაერთიანებული პაკეტები აპების დამატებით ფუნქციებთან ერთად AI-ის უფრო ინტენსიური გამოყენების შესაძლებლობასაც იძლევა.

Facebook Plus, Instagram Plus და WhatsApp Plus

Instagram Plus – თვეში $3.99. Instagram-ის დამატებით ფუნქციებს შორისაა შეტყობინებებისა და Stories-ის შრიფტების შეცვლა, კონკრეტული ადამიანების მიერ Story-ის ნახვის შესახებ შეტყობინებები და პირადი შეტყობინებების წინასწარი დათვალიერება.
Facebook Plus – თვეში $3.99. Facebook-ის პაკეტი მოიცავს პერსონალიზაციის დამატებით შესაძლებლობებს, მათ შორის აპის ხატულების შეცვლასა და სპეციალურ რეაქციებს.
WhatsApp Plus – თვეში $2.99. WhatsApp-ის ფასიანი პაკეტი მომხმარებელს სთავაზობს ექსკლუზიურ თემებსა და ხატულებს, ზარის ინდივიდუალურ ხმებს, სპეციალური ეფექტების მქონე სტიკერებს და მეტი ჩატის ჩამაგრების შესაძლებლობას.

Core და Premium: მეტი წვდომა AI ინსტრუმენტებზე

Core თვეში $7.99 ღირს და Instagram Plus-ის, Facebook Plus-ისა და WhatsApp Plus-ის შესაძლებლობებს აერთიანებს. პაკეტი ასევე ზრდის AI ფუნქციების გამოყენების ლიმიტებს, მათ შორის გამოსახულებებისა და ვიდეოების შექმნისა და რედაქტირებისთვის.

ეს მოიცავს Meta AI-ით მეტი ვიზუალური მასალის გენერირებას და Instagram-ში ისეთი ინსტრუმენტების უფრო ხშირად გამოყენებას, როგორიცაა Restyle. მომხმარებელს ხმოვანი ეფექტებისა და სხვა შემოქმედებითი ფუნქციების გამოყენების მეტი შესაძლებლობაც ექნება.

Premium თვეში $19.99 ღირს და Core-ის ყველა უპირატესობას მოიცავს. განსხვავება AI-ის გამოყენების უფრო მაღალ ლიმიტებშია, რაც მეტი გამოსახულებისა და ვიდეოს შექმნასა და რედაქტირებას იძლევა.

Meta One კონტენტის ავტორებისა და ბიზნესებისთვის

პროფესიული პაკეტები ანგარიშის მართვას, კონტენტის გამოქვეყნებას, აუდიტორიის ანალიზსა და მომხმარებლებთან კომუნიკაციას მოიცავს. ხელმისაწვდომი ინსტრუმენტები და მათი გამოყენების ლიმიტები არჩეული პაკეტის მიხედვით იცვლება.

Essential – თვეში $14.99-დან

Essential მოიცავს ვერიფიკაციის ნიშანსა და ანგარიშის სახელით მოქმედი ყალბი პროფილებისგან დაცვის ინსტრუმენტებს. ამ უპირატესობების მისაღებად შესაბამისმა ანგარიშმა ვერიფიკაცია წარმატებით უნდა გაიაროს.

ბიზნესებისთვის პაკეტი ასევე ზრდის WhatsApp-ზე Meta Business Agent-ის გამოყენების შესაძლებლობას. AI აგენტი მომხმარებლების კითხვებზე დღე-ღამის განმავლობაში პასუხის გაცემაში ეხმარება ბიზნესს.

Advanced – თვეში $49.99-დან

Advanced Essential-ის შესაძლებლობებს კონტენტის დაგეგმვისა და ანალიტიკის დამატებით ინსტრუმენტებს ამატებს. მათ შორისაა:

Instagram Stories-ის გამოქვეყნების დაგეგმვა 30 დღით ადრე;
პოსტებსა და Reels-ში გადასასვლელი ბმულების დამატება, პაკეტით განსაზღვრული ლიმიტების ფარგლებში;
Instagram-ის კონტენტის სტატისტიკის ექსპორტი;
აუდიტორიისა და მსგავსი პროფილების შედეგების უფრო დეტალური ანალიზი;
გუნდის წევრებისთვის Instagram-ის ანგარიშზე წვდომის მიცემა პაროლის გაზიარების გარეშე;
Meta Business Agent-ის პასუხების გაზრდილი ლიმიტი.

აუდიტორიის ზრდისთვის განკუთვნილ ფუნქციებს შორისაა Facebook Reels-ზე უფრო გამოკვეთილი გამოწერის ღილაკი. შესაძლებელია გამოწერის მოწვევების ავტომატურად გაგზავნაც მათთვის, ვინც Facebook-ზე კონტენტთან ურთიერთქმედებს.

Expert და Max – უფრო მაღალი ლიმიტები

Expert-ის ფასი თვეში $149-დან იწყება, Max-ის კი – $499-დან. ეს პაკეტები პროფესიული ფუნქციებისა და Meta Business Agent-ის გამოყენების უფრო მაღალ ლიმიტებს სთავაზობს გუნდებს. იზრდება ანგარიშზე საერთო წვდომის, ბმულების დამატებისა და მხარდაჭერის შესაძლებლობებიც.

ხელმისაწვდომობა და დაგეგმილი სიახლეები

Meta-ს განცხადებით, Meta One-ის პაკეტები გლობალურად ვრცელდება, თუმცა დანერგვა ეტაპობრივია. ფასები, ფუნქციები და ხელმისაწვდომობა შეიძლება განსხვავდებოდეს რეგიონის, აპისა და ანგარიშის მიხედვით. კონკრეტული შეთავაზება მომხმარებელს გამოწერის გაფორმების პროცესში ეჩვენება.

ინდივიდუალური პაკეტების უპირატესობების სხვადასხვა აპში გამოსაყენებლად შესაბამისი პროფილები ერთ Accounts Center-ში უნდა იყოს დამატებული. კონკრეტულ ანგარიშზე ხელმისაწვდომი ფუნქციები გამოწერის შეძენამდე უნდა გამოჩნდეს.

სამომავლოდ კომპანია სერვისის Edits-სა და AI სათვალეებზე გაფართოებასაც გეგმავს. დაანონსებული Edits Plus მოიცავს მეტ ღრუბლოვან საცავს პროექტების მოწყობილობებს შორის სინქრონიზაციისთვის და მომავალ Edits ასისტენტზე დამატებით წვდომას. ასისტენტი Instagram-ის სტატისტიკის გაანალიზებასა და ახალი იდეების მოფიქრებაში დაეხმარება მომხმარებელს.