მეტ შუმერი თანამედროვე AI ინდუსტრიის ერთ-ერთი ყველაზე ცნობილი და გავლენიანი ფიგურაა. ის არის კომპანია OthersideAI-ის დამფუძნებელი და HyperWrite-ის შემქმნელი. მეტი იმ მცირერიცხოვან ადამიანთა ჯგუფს მიეკუთვნება, რომლებიც უშუალოდ მონაწილეობენ ხელოვნური ინტელექტის მომავლის ფორმირებაში. მისი ეს ბლოგ-პოსტი, რომელიც 2026 წლის თებერვლის დასაწყისში გამოქვეყნდა, სოციალურ ქსელებში ნამდვილ მანიფესტად იქცა — ეს არის გულწრფელი გაფრთხილება იმ “ინსაიდერისგან”, რომელიც ხედავს იმას, რაც სხვებისთვის ჯერ კიდევ უხილავია. X-ზე გამოქვეყნებულმა ამ ძალზედ საინტერესო ბლოგმა უკვე 12 მილიონზე მეტი ნახვა დააგროვა
გთავაზობთ მეტ შუმერის ბლოგის სრულ თარგმანს:
გაიხსენეთ 2020 წლის თებერვალი.
თუ მოვლენებს ყურადღებით აკვირდებოდით, შეიძლება შეგემჩნიათ რამდენიმე ადამიანი, რომელიც სადღაც შორს, ოკეანის მიღმა გავრცელებულ ვირუსზე საუბრობდა. მაგრამ უმეტესობა ჩვენგანი ამას ყურადღებას არ ვაქცევდით. საფონდო ბირჟა ყვაოდა, ბავშვები სკოლაში დადიოდნენ, ჩვენ კი რესტორნებში დავდიოდით, ერთმანეთს ხელს ვართმევდით და მოგზაურობებს ვგეგმავდით. ვინმეს რომ ეთქვა, ტუალეტის ქაღალდს ვიმარაგებო, იფიქრებდით, რომ ინტერნეტის რაღაც უცნაურ კუთხეში “გაიჭედა”. შემდეგ კი, სულ რაღაც სამ კვირაში, სამყარო ამოყირავდა. ოფისები დაიხურა, ბავშვები სახლში ჩაიკეტნენ და ცხოვრება ისე გადაეწყო, რომ ერთი თვის წინ ვინმეს რომ აღეწერა — არ დაიჯერებდით.
ვფიქრობ, ახლა ჩვენ ზუსტად იმ ფაზაში ვართ, რომელსაც ჰქვია “ეს გადაჭარბებული მეჩვენება”. ოღონდ ახლა რაღაც გაცილებით უფრო მასშტაბურის წინაშე ვდგავართ, ვიდრე კოვიდი იყო.
უკვე ექვსი წელია AI სტარტაპებს ვაშენებ და ამ სფეროში ინვესტიციებს ვაკეთებ. მე ამ სამყაროში ვცხოვრობ. ამ პოსტს ვწერ ჩემი ოჯახისთვის, მეგობრებისთვის და იმ ადამიანებისთვის, ვინც სულ მეკითხება: “კარგი, რა ხდება სინამდვილეში ამ AI-სთან დაკავშირებით?”. აქამდე სულ “ზრდილობიან”, წვეულებებისთვის შესაფერის პასუხებს ვცემდი. სიმართლე კი ისე ჟღერს, თითქოს ჭკუიდან შევიშალე. მაგრამ უფსკრული იმას შორის, რასაც ვამბობდი და რაც რეალურად ხდება, უკვე საგანგაშოდ დიდია. თქვენ იმსახურებთ სიმართლის ცოდნას, თუნდაც ის გიჟურად გეჩვენოთ.
მინდა ერთი რამ დავაზუსტო: მიუხედავად იმისა, რომ ამ ინდუსტრიაში ვარ, მე თითქმის არანაირი გავლენა არ მაქვს იმაზე, რაც მოხდება. მომავალს ადამიანების საოცრად მცირე ჯგუფი აყალიბებს — რამდენიმე ასეული მკვლევარი ისეთ კომპანიებში, როგორიცაა OpenAI, Anthropic და Google DeepMind. მოდელის ერთი “საწვრთნელი ციკლი”, რომელსაც პატარა გუნდი რამდენიმე თვეში ასრულებს, მთელი ტექნოლოგიის ტრაექტორიას ცვლის. ჩვენ უბრალოდ იმ საძირკველზე ვაშენებთ, რომელიც სხვებმა დააგეს. ჩვენც ისევე ვაკვირდებით პროცესს, როგორც თქვენ — უბრალოდ იმდენად ახლოს ვართ ეპიცენტრთან, რომ მიწისძვრის პირველ ბიძგებს სხვებზე ადრე ვგრძნობთ.
ახლა კი დადგა დრო, ვილაპარაკოთ სიმართლე. არა როგორც შორეულ პერსპექტივაზე, არამედ იმაზე, რაც ახლა ხდება.
ეს რეალურია, რადგან ჯერ მე შემეხო
აი, რა ვერ გაიგო ჯერ კიდევ ტექნოლოგიური სფეროს მიღმა მყოფმა საზოგადოებამ: ჩვენ იმიტომ ვტეხთ განგაშს, რომ ეს ყველაფერი ჩვენ უკვე დაგვემართა. ჩვენ კი არ ვწინასწარმეტყველებთ, არამედ გიყვებით, რა მოხდა ჩვენს სამუშაო ადგილებზე და გაფრთხილებთ, რომ შემდეგი თქვენ ხართ.
წლების განმავლობაში AI ნაბიჯ-ნაბიჯ უმჯობესდებოდა. 2025 წელს კი ახალმა მეთოდებმა პროგრესი წარმოუდგენლად დააჩქარა. ტემპი სულ უფრო და უფრო იზრდებოდა. ყოველი ახალი მოდელი არა მხოლოდ უკეთესი იყო, არამედ ნახტომებს შორის დრო სულ უფრო მცირდებოდა. მე სულ უფრო მეტად ვენდობოდი AI-ს და ვუყურებდი, როგორ აკეთებდა ის საქმეებს, რისთვისაც ადრე ჩემი პირადი ექსპერტიზა იყო საჭირო.
შემდეგ კი, 2026 წლის 5 თებერვალს, ორმა გიგანტმა ერთდროულად გამოუშვა ახალი მოდელები: GPT-5.3 Codex და Opus 4.6. იმ მომენტში რაღაც საბოლოოდ შეიცვალა. ეს არ ჰგავდა სინათლის უცაბედ ანთებას, ეს უფრო ჰგავდა წამს, როცა აცნობიერებ, რომ წყალი ყელამდე მოგებჯინა.
“მე აღარ ვარ საჭირო ჩემი სამუშაოს ტექნიკური ნაწილის შესასრულებლად.”
მე ვეუბნები AI-ს რა მინდა, უბრალო ენით, და ის უბრალოდ ჩნდება. არა როგორც შავი ვერსია, არამედ როგორც მზა პროდუქტი. ვტოვებ კომპიუტერს ოთხი საათით, ვბრუნდები და მხვდება იდეალურად შესრულებული სამუშაო — იმაზე უკეთესიც კი, ვიდრე მე გავაკეთებდი. სულ რამდენიმე თვის წინ მასთან ერთად ვმუშაობდი, ვასწორებდი. ახლა უბრალოდ შედეგს ვუკვეთავ და მივდივარ.
მაგალითად: ვეუბნები AI-ს, რომ მინდა აპლიკაციის აწყობა, ვუხსნი დიზაინს და ფუნქციებს. ის წერს ათიათასობით ხაზ კოდს, თავად ხსნის აპლიკაციას, თავადვე ტესტავს მას, აჭერს ღილაკებს, როგორც ნამდვილი მომხმარებელი და თუ რამე არ მოეწონება — თავადვე ასწორებს. მხოლოდ მაშინ მეუბნება “მზადაა”, როცა თავისივე მკაცრ სტანდარტებს დააკმაყოფილებს. და როცა ვამოწმებ, ის მართლაც უნაკლოა.
არ ვაზვიადებ. ასე გამოიყურებოდა ჩემი ამ კვირის ორშაბათი.
რატომ გეხებათ ეს თქვენ?
AI ლაბორატორიებმა შეგნებული არჩევანი გააკეთეს: მათ ჯერ კოდის წერაში დახვეწეს სისტემები, რადგან AI-ს ასაშენებლად სწორედ კოდია საჭირო. თუ AI დაწერს კოდს, ის შექმნის თავის უფრო ჭკვიან ვერსიას. მათ ეს გააკეთეს და ახლა ყველაფერ დანარჩენზე გადადიან.
ის, რასაც ჩვენ, ტექ-მუშაკები, ბოლო ერთი წელია განვიცდით — როცა ვუყურებთ, როგორ აკეთებს AI ჩვენს საქმეს ჩვენზე უკეთ — არის ის, რაც ყველას ელოდება. სამართალი, ფინანსები, მედიცინა, ბუღალტერია, კონსალტინგი, დიზაინი… არა ათ წელიწადში, არამედ უახლოეს 1-5 წელიწადში.
“მე ვცადე და არ მომეწონა” – დავიწყებული არგუმენტი
ხშირად მესმის: “ChatGPT-ს ვკითხე და სისულელე მიპასუხა”. თუ თქვენ AI-ს 2023-ში ან 2024-ის დასაწყისში სინჯავდით, მართალი ხართ — მაშინ ის ნამდვილად შეზღუდული იყო. მაგრამ AI-ს დროით ეს არის ანტიკური ისტორია. დღევანდელი მოდელები საერთოდ სხვა რამეა.
პრობლემა ისაა, რომ ხალხის უმეტესობა უფასო ვერსიებს იყენებს. უფასო ვერსია ერთი წლით ჩამორჩება იმას, რაც რეალურად არსებობს. AI-ს შეფასება უფასო ChatGPT-ით იგივეა, სმარტფონების ეპოქა ძველი, ღილაკიანი ტელეფონით შეაფასო.
ჩემი მეგობარი ადვოკატია და სულ მეუბნებოდა, რომ AI მის საქმეში ვერ გამოდგებოდა. თუმცა, დიდ იურიდიულ ფირმებთან მაქვს კავშირი და ვიცი — მათი პარტნიორები დღეში საათებს ატარებენ AI-სთან. ერთმა მითხრა: “ეს იგივეა, გვერდით უნიჭიერესი ასისტენტების მთელი არმია გყავდესო”. ყოველ ორ თვეში სისტემა უფრო და უფრო ძლიერი ხდება.
რა სისწრაფით მივდივართ?
- 2022: AI-ს ელემენტარული არითმეტიკა უჭირდა.
- 2023: მან ადვოკატთა გამოცდა ჩააბარა.
- 2024: წერდა პროგრამებს და ხსნიდა მეცნიერულ თეორიებს.
- 2025: ინჟინრებმა სამუშაოს უდიდესი ნაწილი მას გადააბარეს.
- 2026 წლის 5 თებერვალი: ახალმა მოდელებმა ყველაფერი ძველი ისტორიად აქციეს.
არსებობს ორგანიზაცია METR, რომელიც ზომავს, თუ რამდენ ხანს შეუძლია AI-ს დამოუკიდებლად მუშაობა. ადრე ეს იყო 10 წუთი, მერე — ერთი საათი. ბოლო მოდელები (Claude Opus 4.5) უკვე 5-საათიან რთულ დავალებებს ასრულებენ ადამიანის გარეშე. ეს მაჩვენებელი ყოველ რამდენიმე თვეში ორმაგდება. თუ ასე გაგრძელდა, მომავალ წელს AI დამოუკიდებლად იმუშავებს დღეების განმავლობაში, ორ წელიწადში კი — კვირების განმავლობაში.
დარიო ამოდეიმ თქვა, რომ 2026-2027 წლებში AI თითქმის ყველა დავალებაში ადამიანზე ჭკვიანი იქნება. დაფიქრდით: თუ AI მეცნიერებათა დოქტორზე ჭკვიანია, მართლა გგონიათ, რომ თქვენს საოფისე საქმეს ვერ გააკეთებს?
რა უნდა ქნათ ახლა?
ამას იმიტომ არ ვწერ, რომ შეგაშინოთ. პირიქით, თქვენი უპირატესობა ახლა არის სისწრაფე.
- გამოიყენეთ ფასიანი ვერსიები: ნუ დაზოგავთ იმ 20 დოლარს. გამოიყენეთ GPT-5.2 ან Claude Opus 4.6.
- შეიტანეთ AI თქვენს რეალურ საქმეში: ნუ დაუსვამთ ზოგად კითხვებს. თუ ფინანსისტი ხართ — მიეცით რთული ცხრილები. თუ იურისტი — სთხოვეთ კონტრაქტის ანალიზი.
- იყავით პირველები: ის ადამიანი, რომელიც შეხვედრაზე იტყვის: “ეს ანალიზი, რასაც 3 დღე სჭირდებოდა, AI-თ 1 საათში გავაკეთე”, იქნება ყველაზე ღირებული თანამშრომელი. ეს ფანჯარა დიდხანს არ იქნება ღია — მალე ამას ყველა გააკეთებს.
- ასწავლეთ შვილებს ადაპტაცია: ნუ მოამზადებთ მათ ისეთი კარიერისთვის, რომელიც 10 წელიწადში აღარ იარსებებს. ასწავლეთ მათ იყვნენ “შემქმნელები” და მართონ ეს ტექნოლოგია.
ჩემი რჩევაა: დღეში ერთი საათი დაუთმეთ AI-სთან ექსპერიმენტებს. არა კითხვას, არამედ პრაქტიკას. თუ ამას 6 თვე გააკეთებთ, თქვენ უფრო მეტს გაიგებთ მომავალზე, ვიდრე გარშემომყოფების 99%.
მომავალმა უკვე დაგიკაკუნათ კარზე. კარი ან ახლა უნდა გააღოთ და მართოთ პროცესი, ან ცოტა ხანში ის თავად შემოინგრევა.
ბლოგის ორიგინალი ვერსია შეგიძლიათ იხილოთ აქ